“SIPAKKE MANDARNA BE”
Molo di ulaon adat batak manang ulaon natorop, suang songoni tong ulaon di bagas jabu, nasomalna, anggo ina-ina sai ikhon mamakke mandar do laho mangadopi ulaon nasida. Alai, di jaman na serba canggih nuaeng on, nungga godang be halak hita dang mamakke mandar be di bagas sada ulaon, umbahen godang ni massa-massam ni pahean dohot abit na mansai uli idaon. Molo tabereng do pahean ni boru-boru dohot ina-ina masa nuaeng on, nungga sai pittor ijurta naro mamereng nasida, diala pahean nasida na songon patuduhon akka bagian ni dagingni nasida, songon do nuaeng salawar na, dipakke do tong salawar “si ponggol pat” ima pahean na mansai soppit jala pendek.
Gabe olo do sipata ro akka sibahen sega ni roha, alai, molo nipasingot gabe sisogo muse do iba. Alani do gabe sai mekkel au molo huingot sada ulaon na sai mambahen ingot rohakhu tu sada ulaon partangiangan. Molo didok partangiangan, ikhon do marsoring-soring diulahon di sada bagas ni jabu ganup minggu, alani do, sahat ari na ro tu bagas ni jabu ni damang dohot dainang na uli basa i, kebetulan malam rabu do molo so salah.
Dapot jam 08.00 malam, nungga be mangarade parhalado dohot akka ruas dijabu ni damang dohot dainang, dungi dimulai parhalado ma ulaon partangiangan, hira-hira 10 menit, hubege songon na adong manoktoki pintu ni dapur, sai hurippu do huting na mangalului siallongonna di dapur, hape, dung hutilik sian pintu, ai nantulang nai porman do namanuktukki pintu.
“bah, uttung dang pittor husiram pakke air panas nasida” ninna rohakhu dibagasan, ai, nungga rade disi air panas nalaho bahenon tu makan jeda sidung ulaon partangiangan. Ai, sugari husiram, bah nungga mansai maila hinan ahu disi.
Dung masuk nai porman on, dang mamakke mandar, holan huida mamakke salawar “si gotap pat” i, pittor hutinggalhon, ai nungga gabe ro be akka roha sibahen nasega tu pikkiriranhu. Alai, di nahutinggalhon i nasida di dapur i, soppat do tarbereng ahu nasida mamakke mandar na adong hona jomur di kawat ni dapur. Dok ma isi, ninna rohakhu muse, ai tung dang mansai suman idahon nasida annon molo ro tu jolo mamakke salawar “si gotap pat” i.
Dung sai dipakke nasida mandar i, pittor masuk ma nasida tu jolo, anggo sintani ibana mansai tabo ma idahon sian pardalanna. Dungi, hundul ma nasida muse, di nahundul ni nasida dipageser ma daging na tu siamun dohot tu ambirang, holan hona donganna na disiamun dohot nadiambirangna, pittor muruk ma nasida nadua, ai gabe tonu muse mandarna attong.
“ai boasa muruk hamu ?” inna nai porman.
“boasa...boasa...? nimmu dope, naso dibereng ho do gabe tonu au on ??” ninna nai sondu.
Dung hubereng jala hupatakkas mandar na dipakke ni nai porman i, gabe mekkel ma nama ahu songoni dohot akka na adong disi, ai, mandar ni dainang na sering dipakke tu balian do hape na dipakke ni nai porman i, sundat marbuttak-buttak muse, jala tonu.
Eh,,,,,tahe,,,,
